ប្រទេសឡាវ
នៅតែជម្នះសាងសង់ទំនប់វារីអគ្គិសនី សាយ៉ាបុរី
ជាច្រើនខែមកហើយ ដែលរាជរដ្ឋាភិបាលកម្ពុជា
វៀតណាម និងសង្គមស៊ីវិលជាច្រើនបាន ជំទាស់ ចំពោះគម្រោងសាងសង់ទំនប់វារីអគ្គិសនី
សាយ៉ាបុរី នៅប្រទេសឡាវ តែទីបំផុត ឡាវ នៅតែជម្នះសាងសង់ទំនប់
ដ៏ចម្រូងចម្រាស់នេះដដែល។
យោងការចេញផ្សាយរបស់កាសែតក្នុងស្រុកប្រចាំថ្ងៃទី៨
ខែវិច្ឆិកា ឆ្នាំ ២០១២ បានឲ្យដឹងថា កាលពីថ្ងៃពុធ ប្រទេសឡាវ បានធ្វើពិធីក្រុងពាលី
បញ្ចុះបឋមសិលា ដើម្បីសាងសង់ទំនប់វារីអគ្គិសនី សាយ៉ាបុរី ដែលត្រូវចំណាយទឹកប្រាក់ជាង៣ពាន់លានដុល្លារ
និងមានកម្លាំងឋាមពលជាង១ពាន់មេហ្គាវ៉ាត់ តាមការគ្រោងទុកហើយ បើទោះបីជាមានការជំទាស់
ដាច់អហង្កា ពីបណ្តាប្រទេសពាក់ព័ន្ធ ដូចជាកម្ពុជា វៀតណាម ព្រមទាំងសង្គមស៊ីវិល
មួយចំនួនក្តី ដោយកាលពីថ្ងៃទី២៤ខែមេសាឆ្នាំ២០១២
ក្រសួងធនធានទឹកកម្ពុជា និង វៀតណាម បានចេញសេចក្តីថ្លែងការរួមគ្នា ជំទាស់ទៅនឹងសកម្មភាពដ៏គឃ្លើនរបស់ប្រទេសឡាវ និងថៃ ដែលនៅតែមានះ សាងសង់ទំនប់វារីអគ្គិសនីមួយនេះ ក្នុងនោះប្រជាពលរដ្ឋកម្ពុជា រួមនឹងព្រះសង្ឃ ជាង២០០អង្គ ក៏បានដង្ហែ ក្បួន ជំទាស់ទៅនឹងសកម្មភាពសាងសង់ទំនប់ដ៏ចម្រូងចម្រាស់នេះផង ដែរ។
បន្ទាប់មកនៅដើមខែកញ្ញា ឆ្នាំ២០១២ ឯកឧត្តមលឹម
គៀនហោ រដ្ឋមន្រ្តីក្រសួងធនធានទឹក និង ឧតុនិយម បានប្រាប់ក្រុមអ្នកាសែតថា កម្ពុជា នៅតែជំទាស់ដាច់ខាតចំពោះការសាងសង់ទំនប់វារីអគ្គិសនី របស់ភាគីឡាវ
ដរាបណាលទ្ធផលនៃការសិក្សា រកមិនទាន់ឃើញពីផលប៉ះ ពាល់ និងវាយតម្លៃច្បាស់លាស់។
ឯកឧត្តមបញ្ជាក់ថា កម្ពុជា និងវៀតណាម
នឹងពិភាក្សាគ្នា ឲ្យបានល្អិតល្អន់ និង
ស៊ីជម្រៅបន្ថែមទៀតពីបញ្ហានេះ ដោយភាគីឡាវ ក៏បានអញ្ជើញប្រតិភូ
កម្ពុជា និងវៀតណាម ទៅពិនិត្យមើលផងដែរ ពីគម្រោងសាងសង់ទំនប់វារីអគ្គិសនីសាយ៉ាបូរី
ដែលឡាវអះអាងថា ខ្លួនមិនបានចាប់ផ្តើមសាងសង់ឡើយ។
ប៉ុន្តែកាលណោះ
ដំណឹងនេះត្រូវបានខឹងសម្បារ និងជំទាស់មកវិញ ដោយលោកវីរ៉ាភុង វីរ៉ាវង់( Viraphonh Viravong) អនុរដ្ឋមន្រ្តី
នៃក្រសួងរ៉ែ និង ថាមពលឡាវ
ដោយលោកអះអាងថា ជាកំហុសឆ្គងដ៏ធំមួយរបស់អ្នកកាសែត
ព្រោះតាំងពីដើមរៀងមក ប្រទេសឡាវមិនដែលបានចាប់ផ្តើមសាងសង់ ទំនប់វារីអគ្គិសនីនេះ
ម្តងណាឡើយ។
ដោយឡែក ក្នុងជំនួបជាមួយសម្តេចតេជោហ៊ុន
សែន កាលពីថ្ងៃទី១៣ខែកក្កដា ឆ្នាំ២០១២
នៅឯទីក្រុងសៀមរាប លោកជំទាវ យីងឡាក់ ស៊ីណាវ៉ាត្រា
នាយករដ្ឋន្រ្តីថៃ បានជម្រាបជូនសម្តេចហ៊ុន សែនផងដែរថា ថា
សំណង់វារីអគ្គិសនីខាងលើ
ក្រុមហ៊ុនថៃនៅមិនទាន់ដំណើរការសាងសង់នៅឡើយទេ ហើយក្តីកង្វល់របស់បណ្តាប្រទេសក្នុងតំបន់
និងអង្គការបរិស្ថានពិភពលោកផងនោះ
ប្រទេសថៃ និងឡាវ
ព្រមទាំងបណ្តាប្រទេសជាសមាជិកគណកម្មការទន្លេមេគង្គផ្សេងទៀត នឹងធ្វើការពិភាក្សាគ្នាឡើងវិញទៀត។
ជាមួយគ្នានេះដែរ កាលពីថ្ងៃទី១២ ខែកញ្ញា ឆ្នាំ២០១២
ក្រោយកិច្ចប្រជុំរដ្ឋមន្រ្តីឋាមពល អាស៊ាន លើកទី៣០ នាទីក្រុងភ្នំពេញ លោក
ស៊ូលីវង្ស ដារ៉ាវង្ស រដ្ឋមន្រ្តី រ៉ែ និងឋាមពលឡាវ មានប្រសាសន៍ថា ឡាវកំពុងព្យាយាមដំណើរការ
ការសាងសង់ទំនប់វារីអគ្គិសនី សាយ៉ាបុរី ដ៏ចម្រូងចម្រាស់ ដែលនឹងត្រូវចំណាយទឹកប្រាក់
ប្រមាណជាង៣ពាន់លានដុល្លារសហរដ្ឋអាមេរិច ព្រោះជាឱកាស និងជាសិទ្ធិរបស់ឡាវ
ក្នុងការសាងសង់។
លោក
សមសាវ៉ាត ឡេងសាវ៉ាដ (Somsavat
Legsavad)
ឧបនាយករដ្ឋមន្រ្តី នៃប្រទេសឡាវ ដែលត្រូវបានអ្នកកាសែតដកស្រង់សម្តី
បានប្រាប់ក្រុមអ្នកកាសែតកាលពីថ្ងៃទី៦ វិច្ឆិកា ថា ប្រទេសឡាវ បានស្តាប់រាល់យោ
បល់និងអនុសាសន៍ ពីបណ្តាប្រទេស តាមបណ្តោយដងទន្លេមេគង្គរួចហើយ ហើយកិច្ចពិភាក្សា
បានឈានទៅដល់ការព្រមព្រៀងគ្នា ក្នុងការចាប់ផ្តើមគម្រោង ដ៏ចម្រូងចម្រាស់នេះ។
យោងតាមកិច្ចព្រមព្រៀង
ដែលចុះរួមគ្នាកន្លងមក មានខ្លឹមសារថា ប្រទេសទាំងអស់ នៃតំបន់ទន្លេមេគង្គ
ដែលមានកម្ពុជា ឡាវ វៀតណាម និងថៃ ត្រូវតែយល់ព្រមលើកិច្ចព្រមព្រៀង គម្រោងទំបន់វារីអគ្គិសនីណាមួយ
ទើបភាគីពាក់ព័ន្ធខាងលើអាចដំណើរការសាងសង់បាន ហើយតាំងពីដើមរៀងមក កម្ពុជា
និងវៀតណាមបានជំទាស់យ៉ាងខ្លាំងក្លា ចំពោះគម្រោងទំនប់សាយ៉ាបុរីនេះ
ព្រោះទំនប់នេះ នឹងធ្វើឲ្យប៉ះពាល់ដល់សក្តានុពលជីវចម្រុះ បរិស្ថាន និងជីវិតរស់នៅរបស់មនុស្ស
និងសត្វរាប់លានជីវិត នៅកម្ពុជា និងវៀតណាម ។
នៅដើមខែវិច្ឆិកា
ឆ្នាំ២០១២ នេះ ក្នុងដំណើរទស្សនកិច្ច នៅឯការដ្ឋានសាងសង់ទំនប់វារីអកគ្គិ
សនីសាយ៉ាបុរី ប្រទេសឡាវ ឯកឧត្តមលឹម គៀនហោ បានមានប្រសាសន៍ ប្រាប់អ្នកសារព័ត៌មានថា
ទំហំផលប៉ះពាល់ នៃទំនប់នេះ ឯកឧត្តមមិនទាន់អាចវាយតម្លៃបានទេ ដោយទុកឱកាសឲ្យរាជរដ្ឋាភិបាល
ជាអ្នកកំណត់ និងសម្រេច។
កាលពីថ្ងៃទី
៤ ខែវិច្ឆិកា ឆ្នាំ២០១២ នៅវិមានរដ្ឋហរខាំ នៃប្រទេសឡាវ ក្នុងកិច្ចប្រជុំកំពូលអាស៊ី
អឺរ៉ុប សម្តេចតេជោ នាយករដ្ឋមន្រ្តីហ៊ុន សែន បានជម្រាបឯកឧត្តម ជុំម៉ាលី សាំយ៉ាសន
ប្រធា នាធិបតីឡាវ ថា កម្ពុជា មិនជំទាស់ នឹងការសង់សង់ទំនប់វារីអគ្គិសនីនេះទេ
ប៉ុន្តែកម្ពុជា ស្នើឲ្យ ភាគីឡាវ គោរពលក្ខខណ្ឌ
ដែលបានព្រមព្រៀងជាមួយគ្នានាពេលកន្លងមក ដូចជាការ បង្វែរ ចរន្តទឹក
នៃអាងទន្លេមេគង្គជាដើម។
គួររំលឹកថា កាលពីពាក់កណ្តាលខែកក្កដា ឆ្នាំ២០១២អ្នកសម្របសម្រួលគោលនយោបាយប្រចាំអាស៊ីអគ្នេយ៍លោក
ឃឺក ហឺប៊ឺកសុន(Kirk Hrebertson) ប្រសាសន៍ថា
ទំនប់វារីអគ្គិសនី សាយ៉ាបុរី ដែលត្រូវសាសង់ដោយក្រុមហ៊ុន ឆ កានឆាង (Ch karnchang)របស់ថៃនេះ នឹងធ្វើផលប៉ះពាល់ធ្ងន់ ធ្ងរភ្លាមៗ ដល់បណ្តាប្រទេស ដែលស្ថិតក្នុងតំបន់ទន្លេមេគង្គក្រោម
ក្នុងនោះ នឹងធ្វើឲ្យកំណក ឬលំហូរដីល្បាប់ មានការកកស្ទះ ខូចគុណភាពទឹក
ប៉ះពាល់ប្រព័ន្ធអេកូឡូស៊ី ទិន្នផលត្រីនឹងមានការថយចុះ ហើយមនុស្ស ជាង៦៥ លាន នាក់
ក៏នឹងរងផលប៉ះពាល់ផងដែរ។
ជាមួយគ្នានេះ លោក Teerapong Pomund មន្ត្រីនៃអង្គការ Living Group Siam សម្ព័ន្ធអ្នកអភិរក្ស និងក្រុមសហគមន៍
ក្នុងប្រទេសថៃ កាលពីថ្ងៃទី ៣ ខែកក្កដា ឆ្នាំ២០១២ បានថ្លែងថា សម្ព័ន្ធអ្នកអភិរក្ស
នឹងប្តឹងរាជរដ្ឋាភិបាលថៃ
និងក្រុមហ៊ុនបង្កើតអគ្គិសនីរបស់ប្រទេសថៃ(EGAT) ផងដែរ ដែលបានចុះកិច្ចព្រមព្រៀងទិញថាមពលអគ្គិសនី
ជាមួយប្រទេសឡាវ កាលពីថ្ងៃទី៧
ខែសីហា ឆ្នាំ២០១១។
លោក Pomund
បន្តថា៖
រឿងធំបំផុត គឺរដ្ឋាភិបាលថៃ បានបរាជ័យ ដោយមិនអាចគោរពតាម រដ្ឋធម្មនុញ្ញ
ដែលមានន័យថា ត្រូវតែផ្តល់ព័ត៌មានដល់សាធារណជន នៅមុនពេលធ្វើសកម្មភាពណា មួយដែលនឹងប៉ះពាល់ដល់សុខភាព
ប៉ះពាល់ដល់បរិស្ថាន និងសហគមន៍ នៅមូលដ្ឋានកើតឡើង»។
No comments:
Post a Comment