កិច្ចប្រជុំកំពូលអាស៊ាន នឹងមិនផ្តោតលើទំនប់វារីអគ្គិសនី សាយបុរីទេ

កិច្ចប្រជុំកំពូលអាស៊ាន នឹងមិនផ្តោតលើទំនប់វារីអគ្គិសនី សាយបុរីទេ

 អ្នកនាំពាក្យរាជរដ្ឋាភិបាល បានបញ្ជាក់ថា កិច្ចប្រជុំកំពូលអាស៊ានលើកទី២១ ដែលនឹង ប្រព្រឹត្តទៅ ចាប់ពីថ្ងៃទី១៩ ដល់ថ្ងៃទី២១ វិច្ឆិកា ខាងមុខនេះ នឹងមិននិយាយអំពីបញ្ហា ទំនប់ វា រីអគ្គិសនី សាយ៉ាបុរីទេ។

ឯកឧត្តមខៀវ កាញារីទ្ធ រដ្ឋមន្រ្តីក្រសួងព័ត៌មាន និងជាអ្នកនាំពាក្យរាជរដ្ឋាភិបាល បានមាន ប្រសាសន៍ប្រាប់ទូរទស្សន៍ហង្សមាស កាលពីព្រឹកថ្ងៃទី៩ ខែវិច្ឆិកា ឆ្នាំ២០១២ថា កិច្ចប្រជុំកំ​ពូល​នេះ នឹងមិនមលើកយកបញ្ហា នៃប្រ​ទេសជិតខាងមកពិភាក្សានោះទេ ជាពិសេសបញ្ហាការ​សាងសង់ទំនប់វារីអគ្គិនីសាយ៉ាបុរី របស់​ប្រទេសឡាវដ៏ម្រូងចម្រាស់ ។

ឯកឧត្តមបន្តថា បញ្ហា ផលប៉ះពាល់របស់ទំនប់វារីអគ្គិសនី ដែលមានកម្លាំងឋាមពលជាង ១ពាន់មេហ្គាវ៉ាត់នេះ គឺជាតួនាទីរបស់គណៈកម្មការតំបន់ទន្លេមេគង្គ​ជាអ្នកដោះស្រាយ និង​ទទួលខុសត្រូវ។ ឯកឧត្តមបញ្ជាក់ទៀតថា បន្ទាប់ពីមានការពន្យល់ហេតុផលពីអ្នកជំនាញ និងរដ្ឋាភិបាលឡាវ ចំពោះផលប៉ះ​ពាល់​ផ្សេងៗ នៃទំនប់នេះ ក្នុងកិច្ចប្រជុំកំពូលអាស៊ីអឺរ៉ុប កាលពីថ្ងៃទី៤ ខែវិច្ឆិកា ឆ្នាំ២០១២ សម្តេចហ៊ុន សែន ប្រមុខរាជរដ្ឋា​ភិបាលកម្ពុជា ក៏បានឯក​ភាព​ចំពោះការសាងសង់នេះ ប៉ុន្តែ សម្តេចបានទាមទារឲ្យភាគីឡាវ ត្រូវគោរពនូវរាល់​លក្ខ​ខណ្ឌនានា ដែលនិរន្តរភាពបរស្ថាន ដែលប្រទេសពាក់ព័ន្ធ មានកម្ពុជា វៀតណាម ឡាវ និងថៃ បានធ្វើជាមួយ​គ្នា​កន្លងមក។

ខ្លឹមសារនៃ កិច្ចព្រមព្រៀង របស់គណៈកម្មការទន្លេមេគង្គ ឆ្នាំ១៩៥ បានឲ្យដឹងថា ការ​ប្រើ​​ប្រាស់​​ទន្លេមេគង្គ គណៈកម្មការទន្លេមេគង្គ ត្រូវធ្វើការពិគ្រោះយោបល់គ្នាជាមុន ដើម្បី​ឈាន ទៅដល់ការឯកភាព និងព្រមព្រៀងគ្នា  និងមិនត្រូវរំលោភសិទ្ធិលើប្រទេសណាមួយ ដែលជា សមាជិក​គណៈកម្មការទន្លេមេគង្គឡើយ ទោះបីជាការប្រើប្រាស់ទឹកទន្លេមេគង្គ ស្ថិត​ក្នុង​ក្រប​ខណ្ឌប្រ​ទេសរបស់ខ្លួនក្តី។ កិច្ចព្រមព្រៀងក៏ផ្តោតផងដែរ ថា ការប្រើប្រាស់ទឹកទន្លេមេគង្គ ត្រូវធ្វើឡើង​ក្នុងក្របខណ្ឌយុត្តិធម៌ និងសមធម៌។

បេសកកម្ម និងទំនួលខុសត្រូវរបស់គណៈកម្មការទន្លេមេគង្គ គឺផ្តោតលើការគ្រប់គ្រងអាងទឹក ទន្លេមេគង្គ គ្រប់គ្រងវិស័យជលផល ការគ្រប់គ្រងទឹកជំនន់ ស្វែងរកកាលានុវត្តភាព សម្រាប់​អភិវឌ្ឍ​វិស័យកសិកម្ម ការរក្សាឲ្យបាននូវសេរីភាពនៃនាវាចរណ៍ ការអភិរក្សប្រព័ន្ធអេកូឡូស៊ី ការអភិវឌ្ឍវារីអគ្គិសនី ប្រកបដោយនិរន្តរភាព ផងដែរ។

យោងរបាយការណ៍បឋម ដែលរកឃើញដោយគណៈកម្មការទន្លេមេគង្គ កាលពីខែឧសភា ឆ្នាំ​២០១០ បានបង្ហាញថា កម្ពុជា នឹងក្លាយជាប្រទេស ដែលរងផលប៉ះពាល់ដោយប្រយោល ក្នុង​កម្រិតខ្ពស់ ពីការសំណង់ទំនប់របស់ឡាវ ប្រមាណ៤៣% និងវៀតណាម ២៣%  និងកាលពី ខែមីនា ឆ្នាំ២០១១ មានអង្គការសង្គមស៊ីលចំនួន ២៦៣ មកពីបណ្តាប្រទេស៥១ បានស្នើសុំ ឲ្យប្រទេសឡាវ លុបចោលគម្រោងសាងសង់វារីអគ្គិសនី ដ៏មានហានីភ័យនេះ។ ជាមួយគ្នា​នេះដែរ  កាល​ពីពាក់កណ្តាលខែកក្កដា ឆ្នាំ២០១២​ អ្នកសម្របសម្រួលគោលនយោបាយ​ប្រចាំ​អាស៊ី​អគ្នេយ៍​​លោក ឃឺក ហឺប៊ឺក​សុន(Kirk Hrebertson) ​ បានលើកឡើងថា ទំនប់​វារី​អគ្គិសនី សាយ៉ាបុរី ដែល​សាសង់ដោយក្រុមហ៊ុន ឆ កានឆាង (Ch karnchang)របស់ថៃនេះ នឹងធ្វើ​ផល​ប៉ះពាល់​ធ្ងន់ ធ្ងរ​ភ្លាមៗ ដល់​បណ្តា​ប្រទេស ដែលស្ថិតក្នុងតំបន់ទន្លេមេគង្គក្រោម ក្នុងនោះ នឹង​ធ្វើឲ្យ​កំណក​ ឬលំហូរដី​ល្បាប់មាន​ការ​កកស្ទះ ខូច​គុណភាពទឹក ប៉ះពាល់ប្រព័ន្ធ​អេកូឡូ​ស៊ី ទិន្ន​ផល​ត្រីនឹង​មានការ​ថយ​ចុះ ហើយ​មនុស្ស ជាង៦៥ លាន​ នាក់ ក៏នឹងរងផលប៉ះពាល់​ ។

ដោយឡែក នៅថ្ងៃទី៨ ខែវិច្ឆិកា ឆ្នាំ២០១២ បន្ទាប់ពីប្រទេសឡាវ បានធ្វើពិធីក្រុងពាលី បញ្ចុះ បឋមសិលា ដើម្បីសាងសង់ទំនប់វារីអគ្គិសនីសាយ៉ាបុរី អង្គការការពារសត្វព្រៃ ហៅកាត់ថា WWF បានចេញសេចក្តីថ្លែងការណ៍ថ្កោលទោសប្រទេសឡាវថា ការសាង់សង់​ទំនប់វារី​អគ្គិ​សនី របស់ប្រទេសឡាវនេះ គឺជាការមើលស្រាលចំពោះការសម្រេចចិត្តរបស់គណៈកម្មការ ទន្លេមេគង្គកាលពីខែធ្នូឆ្នាំ២០១១ ដែលស្នើឲ្យមានការពន្យាពេលសាងសង់។ អង្គការWWF ក៏ លើកឡើងផងដែរថា ការសាងសង់ទំនប់វារីអគ្គិសនីសាយ៉ាបុរី របស់ឡាវ គឺកំពុងដាកនិរន្តរ ភាព នៃប្រព័ន្ធអេកូឡូស៊ី ទន្លេដ៏សំខាន់ នៅលើពិភពលោកមួយនេះ ឲ្យប្រឈមគ្រោះ មហន្ត​រាយ និងថា ទំនប់នេះ កំពុងបង្កគ្រោះថ្នាក់ដល់កិច្ចសហការក្នុងតំបន់ផងដែរ។

គួររំលឹកថា ចាប់តាំងពីគម្រោងសំណង់ទំនប់វារីអគ្គិនីនេះ ត្រូវបានភាគីឡាវស្នើឡើង តែភាគី កម្ពុជា និងវៀតណាម បាន​ជំទាស់ជានិច្ច ប៉ុន្តែ នៅថ្ងៃទី៧ ខែវិច្ឆិកា ឆ្នាំ២០១២ ប្រទេសឡាវ បាន​សម្រេច​ធ្វើពិធីបញ្ចុះបឋមសិលា ដើម្បីដំណើរការសាងសង់ទំនប់នេះ ជាផ្លូវការ។