កម្ពុជា ត្រៀមចេញឲ្យផុតពីប្រទេស ដែលមានចំណូលទាប

កម្ពុជាត្រូវចាកចេញឲ្យផុតពីឋានៈជាប្រទេសមានចំណូលទាប

ថ្លែងក្នុងពិធីប្រារឰខួបឆ្នាំទី២០នៃភាពជាដៃគូ រវាងរាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី នៅវិមាន​សន្ដិភាព កាលពីរសៀលថ្ងៃទី២១ខែវិច្ឆិកា សម្ដេចតេជោនាយករដ្ឋមន្រ្តីហ៊ុន សែន​បានមាន​ប្រ​សាសន៍​​ថា៖ចក្ខុវិស័យរបស់កម្ពុជា នៅឆ្នាំ២០៣០ខាងមុខ​​ កម្ពុជា​​នឹង​ត្រូវ​ចាកចេញ​ឲ្យផុតពីឋានៈ​ជាប្រទេស​ដែល​មាន​ចំណូលទាប

ខ្ញុំសូមជម្រាប​ជូនអង្គពិធីទាំង​មូល​ថា ក្រោមការជួយ​គាំទ្រពី ធនាគារអភិវឌ្ឍន៍អាស៊ី រាជរ​ដ្ឋា​​ភិបាលដែលមានឧត្ដមក្រុមប្រឹក្សា សេដ្ឋ​កិច្ច​ជាតិ(SNEC)​ជាស្ថាប័ននាំមុខកំពុងរៀបចំយុទ្ធ​សាស្ដ្រស្ដី​ពីចក្ខុ​វិស័យរបស់កម្ពុជាសម្រាប់ឆ្នាំ ២០៣០ ដែលគោលដៅចម្បងគឺ កម្ពុជាត្រូវ​ចាក​ចេញ​​​ឱ្យផុតពីឋានៈនៃ ប្រទេសមានចំណូលទាប ហើយ​ឡើង​ឋានៈ​ទៅជា ប្រទេសមាន​ចំណូលមធ្យមកម្រិតទាបនៅ​ប៉ុន្មានឆ្នាំខាង​មុខ និងទៅជាប្រទេស​មានចំណូលមធ្យម កម្រិត​ខ្ពស់នៅឆ្នាំ២០៣០។គោលដៅបន្ទាប់ទៀតគឺត្រូវសម្រេច​ឱ្យបាននូវ​ការទ្បើង​ឋានៈជាប្រ​ទេស​អភិវឌ្ឍ​ន៍ នៅឆ្នាំ២០៥០ ដោយមិនត្រូវទុក ឱ្យកម្ពុជាធ្លាក់ក្នុងអន្ទាក់នៃ​អង្គប់នៃប្រទេស​មានចំណូលមធ្យមឡើយ)។  

សម្តេចតេជោបន្តថា​៖​​​ ដើម្បីសម្រេចឲ្យបាននូវគោលដៅខាងលើ កម្ពុជា​ត្រូវខិតខំសម្រេចឱ្យ​បាននូវចីរភាព​កំណើនសេដ្ឋកិច្ចខ្ពស់ ដែលជាធម្មតាលើសពី៧% ក្នុងមួយឆ្នាំ សម្រាប់​រយៈពេលវែង ហើយត្រូវបែងចែក​កំណើននេះប្រកបដោយសមធម៌ ។

សម្តេចប្រមុខរាជរដ្ឋាភិបាលក៏បានបង្ហាញនូវក្តីសង្ឃឹមផងដែរថា ធនាគារអភិវឌ្ឍន៍អាស៊ី ដែលមាន​ឯក​ឧត្ដម ហារូហ៊ីកូ គូរូដា(Haruhiko Kuroda)ជាប្រធាន នឹងនៅតែបន្ដផ្ដល់ការគាំទ្រដល់កម្ពុជា តាមរយៈការជំរុញ​នូវ​កិច្ច​​សហ​​ប្រតិ​បត្ដិ​ការលើវិស័យអាទិភាពឱ្យបានកាន់តែរឹងមាំថែមទៀត ក្នុងគោលដៅបន្ដជួយអភិវឌ្ឍន៍ សង្គម​​​​សេដ្ឋ​កិច្ច​កម្ពុជា និងស្នើ​ឲ្យ​ធនាគារអភិ​វឌ្ឍន៍​អា​ស៊ី បន្ដ​ជួយ​កៀគរទាំងធនធានហរិញ្ញវត្ថុ និងផ្នែក​ជំនាញ និងចំណេះដឹងពីធនាគារអភិវឌ្ឍន៍អាស៊ី និងពី​ប្រ​ភព​ខាង​ក្រៅផងដែរ ដើម្បីរួមចំណែកសម្រេចឱ្យ​បាន​នូវគោលកម្ពុជាឆ្នាំ២០៣០ ​​និងឆ្នាំ ២០៥០ ខាងមុខ ដែលធ្វើឲ្យកម្ពុជាចាកផុត​ពីប្រទេស​ដែល​មាន​ចំណូល​ទាបដូចការរំពឹងទុក ។